Buxheti për librat falas. Zgjerimi i listës së përfituesve rrit fondet në 800 milionë lekë

Ministria e Arsimit ka parashikuar rritje të  fondit për  blerjen e teksteve shkollore  për vitin e ardhshëm . Shuma e parashikuar  të shpenzohet nga buxheti i kësaj ministrie  për  të siguruar tekstet shkollore në përdorim falas për nxënësit,  arrin deri në 800 milion lekë  nga 600 milion që ishte  në vitin 2020. Kjo rritje  vjen si nevojë e shtuar  e zgjerimit të listës së përfituesve për librat në përdorim falas,  ku ndryshe nga një vit më parë,  që përfituesit ishin nxënësit deri në klasën e katërt,  tashmë libra  në përdorim falas do të ofrohen dhe për nxënësit e klasave të 5-ta dhe të 6-ta. Sipas  Ministrisë së Arsimit nga këto fonde pritet të përfitojnë  230  deri në 250 mijë nxënës në total, përfshirë ata  në arsimin para-universitar nga shtresat sociale në nevojë.

Rritje të  fondeve nga buxheti i ministrisë së arsimit  janë parashikuar të financohen  edhe për  të mbuluar shpenzimet për bursa, kuotë ushqimore të nxënësve me nevoja të vecanta si dhe fëmijëve që rrezikojnë të mos  arsimohen , me  ndikim në uljen e braktisjes shkollore, shuma parashikuar është  70 milion lekë  më një rritje prej 40% krahasuar me  një vit më parë ku do të përfitojnë  rreth  1300-1400 nxënës të arsimit para-universitar nga shtresat sociale në nevojë.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.