“Buzëqesh nga Shqipëria”, fushata e turizmit rinis nga dizajni – Të rinjtë në qendër të projektit

“Smile from Albania”, ose “Buzëqesh nga Shqipëria” duket se është fushata dhe slogani që ka zgjedhur Agjencia Kombëtare e Turizmit për të promovuar bukuritë e vendit tonë gjatë kësaj vere.

Pavarësisht se fushata është aktive prej disa ditësh, ditën e enjte janë hapur procedurat e shërbimit të dizajnit të logos, fletëpalosjeve, infopointeve, stendave dhe materialeve promocionale.

Kështu duket se logoja, bluzat dhe materialet e tjera të shfaqura në prezantimin e projektit, siç duket në foton më poshtë, do të ribëhen nga e para.

Për shërbimin e konceptit dhe dizajnit është vënë në dispozicion një fond prej 1.8 milionë lekësh.

Sipas ministrit të Turizmit dhe Mjedisit, Blendi Klosi, do të jenë rreth 1 mijë të rinj që do të angazhohen në pritjen me buzëqeshje të turistëve që vizitojnë vendin tonë dhe që do të kontribuojnë për një mjedis më të pastër.

Në dokumentet e procedurës, zbulohet se do të vendosen pika informacioni në aeroportin e Rinasit, Berat dhe Vlorë, ndërsa pika të tjera në formë çadre, dere, njeriu, apo puneske do të vendosen në 15 vende të tjera kryesisht përgjatë bregdetit.

Ndër materialet promocionale do të ketë bluza, kapele, trasta ekologjike, byzylyqe, bustina sheqeri, tavlla ekologjike dhe erashka të branduara me logon dhe detaje të tjera të dizajnit të fushatës.

Për rekrutimin e të rinjve do të krijohet edhe një spot i posaçëm, si dhe një spot tjetër i përgjithshëm i projektit. Këto spote do të shpërndahen kryesisht në internet përmes rrjeteve sociale Facebook, Instagram, Youtube dhe Google.

Po ashtu, ditën e enjte, AKT ka hapur procedurën për shërbimin e dizajnit të logos dhe materialeve të tjera lidhur me Festën e Traditës, e cila do të ketë 21 aktivitete në qytete të ndryshme të vendit.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.