ByPass-i i Tepelenës, hapet tenderi për lotin e parë – Pritet të kushtojë 2.4 mld lekë
Autoriteti Rrugor Shqiptar ka hapur tenderin për ndërtimin e lotit të parë të Bypass-it të Tepelenës. Projekti përfshin lidhjen e dy segmenteve rrugore, atë të segmentit Levan-Tepelenë në hyrje me segmentin në dalje Tepelenë-Gjirokastër-Kakavijë, si pjesë e korridorit Veri-Jug.
Fondi limit nga buxheti i shtetit, caktuar për kryerjen e punimeve është rreth 2.4 miliardë lekë, ose rreth 18.9 milionë euro me kursin aktual të këmbimit. Ndërkohë që kohëzgjatja e punimeve do të jetë 22 muaj pas nënshkrimit të kontratës, që llogaritet që segmenti të jetë i përfunduar në Qershor të vitit 2020.
Klasifikimi i rrugës bie në kategorinë ndërurbane dytësore, ndërsa shpejtësia maksimale është projektuar në 100 kilometra në orë.
Rruga e re do të shtrihet përgjatë rrugës ekzistuese 2.7 kilometra, ndërkohë që gjatë punimeve nuk do të preket trafiku rrugor, pasi është parashikuar një rrugë shërbimi brenda qytetit për devijimin e trafikut.
Projekti parashikon zgjerimin e rrugës në krahun e shpatit në zonën e Kalasë, pastrimin e mureve të kalasë dhe rikonstruksionin e një ure ekzistuese.
Në të ardhmen, segmenti do të realizojë lidhjen edhe me Kardhiqin, ndërsa do t’i japë mundësi hapjes së projektit të lotit të radhës së rrugës Korçë-Ersekë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.