CDC ul kohën e rekomanduar të izolimit – “Rastet asimptomatike në SHBA, të izolohen për vetëm 5 ditë, nga 10”
Autoritetet në Shtetet e Bashkuara kanë shkurtuar në nisje të javës periudhën e izolimit për amerikanët me infeksione asimptomatike të Covid-19 në 5 ditë, nga 10 ditë që udhëzohej më parë. Qendra për Kontrollin dhe Parandalimin e Sëmundjeve theksoi gjithashtu se personat asimptomatik, duhet të ndjekin një periudhë 5 ditore të vendosjes së maskave pasi të përfundojnë izolimin.
Agjencia rekomandoi gjithashtu një karantinë 5-ditore për të ekspozuarit ndaj virusit që janë të pavaksinuar apo janë 6 muaj pas marrjes së dozës së dytë të vaksinës së Pfizer apo Moderna dhe 2 muaj pas vaksinës së J&J. Periudha e karantinës duhet të ndiqet nga përdorim strikt i maskës për 5 ditë të tjera. Sipas agjencisë, izolimi ndan njerëzit e sëmurë me një sëmundje ngjitëse nga njerëzit që nuk janë të sëmurë, ndërsa karantina ndan dhe kufizon lëvizjen e njerëzve që janë të ekspozuar ndaj një sëmundje ngjitëse, për të parë nëse ata sëmuren më vonë.
“Rekomandimet e përditësuara të agjencisë për izolimin dhe karantinën, balancojnë atë që ne dijmë për përhapjen e virusit dhe mbrojtjten e ofruar nga vaksinimi dhe doza nxitëse”- tha shefja e agjencisë, Rochelle Walensky. Omicron zë 75% të rasteve në SHBA, sipas CDC. Penetrimi i infeksionit po vihet re tek popullsia e vaksinuar plotësisht, përfshirë tek ata që kanë marrë një dozë të tretë nxitëse.
Megjithatë, Omicron duket se shkakton sëmundje më të lehtë tek këta njerëz, me disa që nuk kanë simptoma fare. Reduktimi i rekomandimit të karantinës nga 10 ditë do të ndihmojë njerëzit asimptomatik që të rikthehen në punë apo shkollë, me masat e duhura, sipas ekspertit të sëmundjeve infektive, Anthony Fauci. Individët që kanë marrë dozën nxitëse nuk duhet të karantinohen pas një ekspozimi, por duhet të vendosin mask për 10 ditë, sipas CDC.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.