Ç’do të thotë Trump në Davos? – “Amerika e Para” dhe reforma e taksave, në krye të axhendës

“Amerika e Para”, një betejë kundër praktikave të padrejta tregtare dhe një bashkëbisedim i ashpër me liderët e tjerë. Këto janë disa nga pritshmëritë e analistëve mbi pjesëmarrjen e presidentit amerikan, Donald Trump, në Forumin Ekonomik Botëror të Davosit.

Analistët e fushave të ndryshme, si mbrojtja, politika e jashtme, ekonomia, etj, japin parashikimet e tyre mbi presidentin më të paparashikueshëm në historinë moderne të Shteteve të Bashkuara të Amerikës.

Që kur mori detyrën një vit më parë, Trump ka përmbysur politikat e paraardhësve të tij, duke hedhur poshtë edhe arritjen e tyre. Kritikët frikësohen se, Trump ka larguar dhe fyer aleatët e rëndësishëm, ndërsa mbështetësit e tij e lavdërojnë për axhendën “Amerika e Para”.

Gjithsesi, disa analistë shprehen se, Trump do të mburret për atë çfarë ka arritur në SHBA, gjatë vitit të kaluar. Padyshim që në forumin e Davosit, presidenti amerikan do të flasë edhe për reformën tatimore dhe për vendimet e kompanive më të mëdha për tu rikthyer në Amerikë, që do të nxisin ekonominë dhe do të krijojnë vende pune.

Megjithatë, parashikohet që Trump do të ketë debate me liderët kryesorë, sidomos me kancelaren gjermane, Angela Merkel, dhe me presidentin francez, Emmanuel Macron.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.