Centralet diellorë të privatëve – Diversifikimi i burimeve të prodhimit të energjisë, avancon projekti 50 MW në Libofshë të Fierit
Teksa centralet fotovoltaike të Karavastasë dhe Spitallës, parashikohet të jenë në fazë ndërtimi përgjatë 3-vjeçarit të ardhshëm, investitorët privatë, që nuk përfitojnë nga masat mbështetëse të qeverisë, po avancojnë me projektet e tyre për prodhimin e energjisë nga dielli. Pas aplikimit në Ministrinë e Infrastrukturës dhe Energjisë për ndërtimin e një centrali me fuqi të instaluar prej 50 MW, në Libofshë të Fierit, shoqëria“Info-Telecom” ka aplikuar pranë Agjencisë Kombëtare të Mjedisit për të marrë lejet mjedisore, që lejojnë vazhdimin e projektit.
Paralelisht, në muajin prill të vitit të kaluar Këshilli i Ministrave i hapi rrugë ndërtimit të 2 impianteve të mëdhenj në zonën e Sheq-Marinasit në Fier, që do të jenë investime private e që gjithashtu nuk do të përfitojnë nga masat mbështetëse. Secili prej centraleve do të ketë një fuqi të instaluar prej 50 MW, me një total prej 100 MW, teksa koha për ndërtimin e vënien në operim do të jetë brenda 50 muajve nga marrja e lejes së ndërtimit.
Ndërtimi i këtyre impianteve pritet të japë një kontribut të rëndësishëm në drejtim të diversifikimit të burimeve të prodhimit të energjisë, duke qenë se aktualisht energjia diellore mbetet pak e shfrytëzuar në vendin tonë, teksa në prodhim janë 11 impiante të vegjël, me fuqi totale të instaluar 23 MW. Sipas të dhënave zyrtare të fundit të disponueshme, për periudhën janar-shtator 2021 këto impiante prodhuan 34 306 mwh energji, por ndonëse sasia totale e prodhuar rezultoi në rritje, në raport me prodhimin total të energjisë, ato përbënin vetëm përbën 0.46% të energjisë totale të prodhuar.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.