CEO i Moderna: Duhen vaksina të reja kundër Omicron – Biontech: Na duhen të dhëna, është e rëndësishme të vaksinohemi

Bollëku i mutacioneve në variantin Omicron ndoshta ndihmon për të shpëtuar nga mbrojtja e vaksinave ekzistuese dhe kërkon zhvillimin e formave të reja të imunizimit, pra vaksinave të reja, njoftoi CEO i Moderna, Stephane Bancel.

Ka të ngjarë që do të duhen muaj për të zhvilluar dhe shpërndarë këto vaksina të përditësuara të cilat më pas mund të shpërndahen në numër të madh, tha ai. Nuk ka asnjë mënyrë që vaksinat aktuale të ofrojnë të njëjtin nivel mbrojtjeje kundër Omicron si kundër Delta.

Bancel shtoi se numri i lartë i mutacioneve që përdor virusi e bën të mundur dhe të nevojshme që vaksina aktuale të modifikohet. Më parë ai u shpreh se mund të duhen muaj për të filluar prodhimin e një vaksine që funksionon kundër Omicron.

Ndërkohë biokimistja e kompanisë BionTech, Katalin Kariko, një pioniere e teknologjisë mRNA me të cilën u prodhuan vaksinat Pfizer dhe Moderna mendon se është ende herët të thuhet se sa e redukton varianti i ri Omicron i koronavirusit mbrojtjen nga vaksinat. Ajo që ka rëndësi është të vazhdohet me vaksinimet.

Sipas saj nuk është e nevojshme të krijohet një vaksinë e re për çdo variant pasi virusi nuk e ka luksin të ndryshojë mënyrën e hyrjes në qelizë pasi ato janë mjaft të kufizuara. Ajo thekson gjithashtu se sa më shumë njerëz të vaksinohen, aq më pak shanse ka që virusi të evoluojë dhe të ndryshojë.

E . S /  SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.