Çfarë diskutohet sot në Kuvend – PS, kërkesë për futjen e organikës e pagave për vettingun
Mbledhja e Kuvendit në seancë plenare ditën e sotme do të nisë rreth orë 10:00 dhe në rendin e ditës përfshihet ratifikimi i tre marrëveshjeve, si dhe një akt normativ.
Konkretisht bëhet fjalë për aktin normativ të datës 16 Gusht për disa ndryshime në “Buxhetin e vitit 2017”. Ai është lëshuar nga Ministria e Financave dhe përfshin disa ndryshime të vogla në buxhet, rritje të huadhënies për energjinë dhe ndryshime të tjera minimale në numrin e punonjësve.
Ndër projektligjet që pritet të ratifikohen janë:
Marrëveshja mes Shqipërisë dhe Mbretërisë së Bashkuar të Britanisë së Madhe e Irlandës së Veriut, që plotëson Konventën Evropiane për Ekstradimin, të vitit 1957”
Marrëveshja mes qeverisë shqiptare dhe asaj të Gjermanisë për bashkëpunim financiar në programin e rinovimit të konvikteve në kampusin universitar të Tiranës
Marrëveshja mes qeverisë shqiptare dhe asaj të Suedisë për programin e “Forcimit të Policimit të Komuniteti në Shqipëri”.
Por krahas këtyre çështjeve që kanë hyrë tashmë në rendin e ditës, pranë sekretariatit të Kuvendit kanë ardhur edhe dy kërkesa nga grupet parlamentare të PS dhe PD.
Në kërkesën e Grupit Parlamentar të Partisë Socialiste kërkohen futja për shqyrtim dhe miratim në rendin e ditës të projektvendimeve për strukturat, organikat dhe pagat e organeve të vettingut.
PS kërkon gjithashtu futjen në rend dite për miratim të kthimit të ligjit për “Dhomat e Tregtisë dhe Industrisë”.
Ndërkohë, në kërkesën e tyre, Grupin Parlamentar i Partisë Demokratike kërkon shqyrtimin e kërkesës për zhvillimin e një referendumi në lidhje me importin e mbetjeve në Shqipëri.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.