Çfarë është marrëveshja “stili Kanada”, që BE dhe Mbretëria e Bashkuar arritën për Brexit

Pas muajsh negociatash, Mbretëria e Bashkuar dhe Bashkimi Evropian kanë rënë dakord më në fund për një marrëveshje të shumë pritur pas Brexit për të përshkruar marrëdhëniet e tyre të ardhshme pasi MB të largohet zyrtarisht nga blloku në 31 Dhjetor.

Marrëveshja do të “mbrojë interesat evropiane“, tha Presidentja e Komisionit Evropian Ursula von der Leyen, duke e quajtur atë “historike”. “Më në fund mund ta lëmë Brexit pas nesh. Evropa do të vazhdojë të ecë përpara,” shtoi ajo.

Kryeministri i Mbretërisë së Bashkuar Boris Johnson tha se ata kishin përfunduar “marrëveshjen më të madhe tregtare deri më tani (…) një marrëveshje gjithëpërfshirëse të tregtisë së lirë të stilit Kanada midis MB dhe BE” pa kuota ose tarifa.

Por çfarë është marrëveshja “stili Kanada”?

Marrëveshja e BE me Kanadanë quhet Marrëveshja Gjithëpërfshirëse Ekonomike dhe Tregtare, ose shkurt Ceta.

BE filloi negociatat me Kanadanë në 2009 dhe Ceta hyri në fuqi përkohësisht në 2017, megjithëse nuk është nënshkruar ende nga të gjitha vendet anëtare të BE.

Ne kemi dëgjuar shumë për dëshirën e një marrëveshjeje “me tarifë zero, me kuotë zero” midis MB dhe BE. Ceta nuk e bën këtë.

Ceta heq qafe shumicën, por jo të gjitha, tarifat (që janë taksat mbi importet) për mallrat e tregtuara midis BE dhe Kanadasë. Tarifat mbeten për shpendët, mishin dhe vezët.

Ajo gjithashtu rrit kuotat (kjo është sasia e një produkti që mund të eksportohet pa tarifa shtesë) por nuk i heq fare ato. Për shembull, kuotat për eksportet e djathit të BE në Kanada rriten nga 18,500 ton në 31,972 ton në vit.

Marrëveshja gjithashtu bën pak për tregtinë e shërbimeve dhe në veçanti pothuajse asgjë për tregtinë e shërbimeve financiare, gjë që është shumë e rëndësishme për ekonominë e Mbretërisë së Bashkuar.

Ceta mbron “indikacionet gjeografike” të BE-së, që do të thotë për shembull që proshuta Parma mund të bëhet vetëm në Itali dhe djathi Kamembert në Francë, dhe Kanada nuk mund të importojë diçka si camembert nga ndonjë vend tjetër.

Dosti Banushi – SCAN
Burimi: BBC

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.