Çfarë ka ndodhur me shkëmbimet tregtare Shqipëri-Kosovë gjatë muajit dhjetor 2018? Si ndryshuan eksportet
Shqipëria ka njohur një rritje të ndjeshme të nivelit të eksporteve drejt Kosovës gjatë muajit të kaluar. Referuar të dhënave të tregtisë së jashtme të publikuara nga INSTAT, Shqipëria eksportoi në Kosovë në muajin dhjetor më shumë se 2.1 miliardë lekë mallra duke njohur një rritje 700 milion lekësh krahasuar me dhjetorin e vitit 2017.
Edhe në rang vjetor (janar-dhjetor 2018) niveli i eksporteve u rrit me 6 miliardë lekë më shumë. Në janar-dhjetor 2017 eksportet ishin rreth 21 miliardë lekë ndërsa në janar-dhjetor 2018 ato u rritën në 27 miliardë lekë.
Ndikimin më të madh në këtë rritje e kanë pasur grupmallrat “materiale ndërtimi dhe metale” si dhe grupmallrat “minerale, lëndë djegëse dhe energji elektrike”.
Ndryshe nga sa ka ndodhur me eksportet, importet e Shqipërisë nga Kosova nuk kanë njohur të njëjtin nivel ndryshimi.
Në dhjetor të vitit 2018, Shqipëria importoi nga Kosova 823 milionë lekë mallra ndërsa në rang 12 mujori (janar-dhjetor) eksportet ishin 8.9 miliardë lekë. Në krahasim me vitin 2017, gjatë vitit të kaluar importet u rritën me rreth 500 milionë lekë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.