Christine Lagarde: ”Lufta tregtare midis SHBA-së dhe Kinës po peshon ‘si një re e madhe, e errët’ mbi ekonominë globale”
Për Presidenten e re në krye të Bankës Qendrore Europiane, Christine Lagarde, lufta tregtare midis SHBA-së dhe Kinës është kërcënimi më i madh për ekonominë globale. Lagarde, e cila ka drejtuar Fondin Monetar Ndërkombëtar që nga viti 2011 dhe u zgjodh në korrik për të zëvendësuar Mario Draghi nga 1 nëntori, tha se tarifat që SHBA dhe Kina kanë vendosur me njëri-tjetrin, janë tepër të larta.
“Unë mendoj se lufta tregtare mes dy vendeve është pengesa më e madhe për ekonominë globale” – është shprehur Lagarde.
Negociatorët e tregtisë nga Shtetet e Bashkuara të Amerikës dhe Kina kanë vendosur të rifillojnë bisedimet mbi nivelin parimor muajin e ardhshëm në Uashington. Kërcënimet e tarifave të vendosura, kanë trazuar tregjet financiare dhe ngjallën shqetësime për një recesion global.
“Sa më shumë të zgjasë kjo gjendje, aq më shumë pasiguri shtohen. Dhe nëse jeni investitor apo nëse keni një ndërmarrje, pavarësisht nga sa kapital keni, sërish nuk do të investoni në një situatë të tillë, por do të rrini në pritje.’’– ka shtuar Lagarde në një intervistë për CNBC.
Përveç Kinës, Presidenti Donald Trump ka kërcënuar edhe Europën dhe për masa proteksioniste. Kohët e fundit, pas bisedimeve me drejtuesit e Bashkimit Europian, Trump është shprehur me një ton optimist për perspektivat në lidhje me një marrëveshje të drejtë tregtare, pa imponuar tarifa për importet e makinave.
“Europa dhe Shtetet e Bashkuara kanë qenë miq për dekada dhe shekuj, dhe siç e dini, kanë qenë në të njëjtën anë të fushës së betejës dhe kanë shpëtuar njëri-tjetrin në shumë raste,” tha Lagarde. “Dhe unë i jam shumë mirënjohës për Shtetet e Bashkuara. Nuk është një marrëdhënie që duhet të shndërrohet në çdo lloj lufte tregtare. ”
Gjatë qëndrimit të saj në FMN, Lagarde mbikëqyri programet e shpëtimit për Greqinë, Portugalinë dhe Irlandën gjatë krizës së borxhit sovran që arriti kulmin në 2001 dhe 2012.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.