Cila është situata e koronavirusit në Itali? Senatori italian Rampi në lidhje direkte me SCAN: Me siguri do të ketë pasoja edhe në ekonomi
Senatori italian Roberto Rampi ka shpjeguar në një lidhje direkte nga Lombardia, që është një nga rajonet e prekura, situatën e krijuar nga përhapja e koronavirusit kinez. Ai evidentoi se situate është nën kontroll dhe se janë marrë masat për të kufizuar përhapjen e tij dhe për të minimizuar dëmet si në jetën njerëzore, ashtu edhe në ekonomi. Rampi evidentoi se ka pasur disa sjellje jo racionale në raste të tilla, si dyndja nëpër supermarkete për të blerë ushqime më shumë sesa zakonisht.
“Unë ndër të tjera jam në Lombardi afër Milanos aty ku situata mund të themi është prekur. Ka disa masa nga sot në veprim. Janë aktivitetet kulturore dhe sportive që janë të mbyllura.
Ndër të tjera ka pasur edhe sjellje jo dhe aq racionale në supërmarkete. Njerëz që mbanin radhë, disa linja hekurudhore kanë qenë bosh, njerëzit që nuk çojnë dot fëmijët në shkollë dhe nuk shkojnë në punë. Por duhet evidentuar se ky është një rast i parandalimit dhe i kujdesit që po tregohet. Problemet dhe dëmet janë të mëdha por kontrollet janë të gjera. Jemi të vetëdijshëm për personat e prekur por edhe që ka një mundësi shumë të madhe për ta kuruar këtë sëmundje që prek kryesisht njerëzit me imunitet të dobët dhe më sëmundje kronike. Jemi duke marrë masa për parandalimin dhe jemi të bindur se do ta zgjidhim sa më shpejt” u shpreh Rampi.
I pyetur nga gazetari i SCAN Arbër Hitaj nëse masat e marra do të kenë impakt në ekonominë italiane, senatori tha se ato kanë filluar të ndjehen. Ai evidentoi faktin se tregjet kanë reaguar menjëherë ndaj koronavirusit.
“Me siguri që do të ketë pasoja në ekonomi. Sektorët më të prekur janë sektori kulturor dhe të tjerë që lidhen me tregtinë. Pasi mesa duket teksa ndalohet gjithçka, ato do të preken. Sektorët të tjerë do të kenë ngadalësim por qeveria është në kontakt me çdo biznes dhe ka gati një propozim ekonomik që do t’i shkojë atyre sektorëve që preken nga ky bllokim” tha Rampi.
SCAN
Koronavirusi ne Itali/ Live me senatorin italian Federico Rampi
Posted by RADIO TELEVIZIONI SCAN on Monday, February 24, 2020
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.