Cilat janë bashkitë “shembullore” në vend? – 9-mujori /51 mln euro borxhe, njësitë që kursyen
Pushteti vendor ka krijuar një stok detyrimesh të prapambetura për 9 muajt e parë të vitit në vlerën e 6.3 miliardë lekëve, apo 51 milionë eurove kundrejt qytetarëve dhe bizneseve. Por ndërkohë që disa bashki janë treguar dorëlëshuar apo të pakujdesshme në tenderimin dhe hapjen e projekteve pa pasur në dispozicion fondet e duhura, TV SCAN liston ato njësi të qeverisjes vendore të cilat kanë më pak detyrime duke u treguar “shembullore” në këtë drejtim, pavarësisht se mund të kenë kursyer shërbimet për qytetarët.
Por duke pasur parasysh detyrat e lëna nga qeveria qendrore, objektivi është të mos krijojnë borxhe . kështu, 10 njësitë e qeverisjes vendore që kanë më pak detyrime mund të quhen model. Sipas të dhënave të Financave, ato janë Bashkia Mallakastër me rreth 11 milionë lekë borxhe; Bashkia Fushë-Arrëz, Bashkia Vau i Dejës, Bashkia Përmet, Bashkia Konispol; Bashkia Maliq; Bashkia Prrenjas ; Bashkia Shkodër; Bashkia Pustec; Bashkia Libohovë me vetëm 0.2 mln lekë detyrime. Ndërsa qarqet që kanë më pak detyrime të prapambetura, janë Qarku Korçë, Vlorë dhe Kukës.
Ndërkaq, nga totali i stokut të detyrimeve vendore, peshën më të madhe prej 3 miliardë lekësh e zënë investimet, 937 milionë lekë e zënë vendimet gjyqësore për pushime të padrejta nga puna të punonjësve lokalë. 928 milionë lekë të tjera janë shërbime të papaguara, ndërsa një pjesë të vogël zënë sigurimet shoqërore, shëndetësore dhe të ardhurat personale.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.