Cilat janë institucionet e “fshehta”? – Mungesa e transparencës me publikun, 600 ankesa në 8 muaj
Pavarësisht se i detyron ligji që të jenë transparente dhe të japin informacion për publikun sa herë që u dorëzohet një kërkesë, shumë institucione tregohen të “fshehta” në këtë drejtim apo neglizhente duke refuzuar informimin. Vetëm në 8 muajt e parë të vitit qytetarët kanë depozituar 600 ankesa ndaj institucioneve të ndryshme.
“Për tetëmujorin e parë të vitit 2018 kemi përsëri mbi 600 ankesa dhe që parashikohet që deri në fund të vitit të trajtohen ndoshta mbi 800 të tilla. Natyrisht që të themi se situata e transparencës së autoriteteve në vendin tonë është 100%, natyrisht që këtu nuk do të isha as korrekt për sa i përket ligji, e nuk do isha as i sinqertë me ju, por në radhë të parë me qytetarët. Ka një përmirësim tejet të ndjeshëm”, u shpreh Besnik Dervishi, Komisioner për të Drejtën e Inofrmimit
Por cilat janë institucionet publike që fshehin informacionin? Gjatë vitit 2018, Komisioneri për të Drejtën e Informimit ka publikuar në total 30 vendime, nisur nga ankesat e qytetarëve, duke i detyruar këto institucione tu vënë në dispozicion informacionin e kërkuar.
Konkretisht, mungesë transparence kanë treguar Prokuroritë, disa gjykata, ministri të ndryshme, bashki si ajo Cerrik, Fier, Tiranë, Bulqizë, Drejtoria e Përgjithshme e Tatimeve, Komisioni i Pavarur i Kualifikimi, Agjencia Kombëtare e Burimeve Natyrore, Avokatura e Shtetit, etj. Me ligjin e miratuar 4 vite më parë, është detyrim që informacioni i kërkuar të jepet brenda 10 ditëve pune.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.