Cilësia e rrugëve – 2.1 milionë euro për studimin e fizibilitetit
Niveli i investimeve, por kryesisht cilësia e ndërtimit të rrugëve është bërë shpesh objekt i debateve mes forcave politike. Ndërtimi i tyre pa studime të plota dhe marrja e tyre nga ana e qeverisë në fazë përfundimtare vetëm tenderimi do të lehtësonte shumë procedura. Në projektligjin e paraqitur nga qeveria synohet ratifikimi i marrëveshjes financiare, për projektin me objekt “Studime fizibiliteti, hartim dhe planifikim në nivel përfundimtar dhe studim të ndikimit mjedisor në fushën e infrastrukturës”, me një hua të butë në shumën 2.1 milion euro.
“Diskutohet shpesh që janë bërë 1 kilometër rrugë nga qeveria shqiptare, por janë bërë mbi 140 km rrugë. Por, ajo që ka ngrënë një energji shumë të madhe është rehabilitimi i akseve ekzistuese, të cilat janë plotësisht jashtë standardeve dhe kjo shikohet edhe nga aksidentet e shumta automobilistike që bëhen. Një nga masat që po marrim ne sot është edhe riformatimi i mënyrës së si bëhet mirëmbajtja e rrugës nga kompanitë që i kanë këto rrugë me koncesion. Ka qenë realisht shumë e vështirë që ne të krijonim me mundësitë financiare që kemi, hapje aksesh të reja pa rehabilituar akset kryesore përballë edhe fluksit kryesor që qarkullon sot në Shqipëri. Dhe sidomos vëmendja e qeverisë ndaj krijimit të bypass-eve në mënyrë të veçantë për qytetet kryesore të vendit, bypass- e të mëdha ose edhe bypass-e të vogla është vetëm për të rritur shpejtësinë e lëvizjes, për të ulur natyrisht edhe numrin e aksidenteve apo hotspotet që kanë shoqëruar vazhdimisht sistemin tonë infrastrutkuror.”
Ndërsa deputete e PD, Jorida Tabaku, u shpreh se qeveria s’ka studime të qarta dhe se kredia po merret vetëm për koncensionarët.
“Kjo është e papranueshme që në Komisionin e Ekonomisë të vijnë tre përfaqësues të qeverisë shqiptare dhe asnjëri nuk di të thotë një fjalë për projektin. Zonja përmendi kushtet dhe termat e kredisë dhe nuk dëgjuam asgjë tjetër. Në qoftë se nuk ishte gati qeveria shqiptare, ta kishim shtyrë për një ditë tjetër këtë prezantim. Ne mundet mjaftueshmërisht të lexojmë dhe të diskutojmë me njëri-tjetrin, por këtu vjen qeveria që prezanton projektin.”
Kjo marrëveshje është kredi e akorduar nga qeveria italiane, nëpërmjet institucionit financiar italian, dhe do të merret për një afat maturimi prej 26 vjetësh. Periudha pa pagesë principali 192 muaj duke filluar nga data e disbursimit të parë. Ndërkohë projekti është pjesë e parashikimeve buxhetore të Ministrisë së Infrastrukturës dhe Energjisë për periudhën 2016 – 2018, faza II, konkretisht në programin “Transporti rrugor”.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.