Cilësia e titujve të korporatave – OECD: 25% e emetimeve të reja nuk janë në gradë investimi
Titujt e borxhit të korporatave janë rritur në nivele rekord që prej krizës financiare të vitit 2008 dhe ka krijuar një stok botëror të borxhit me cilësi më të ulët dhe kërkesa më të larta të ripagimit, krahasuar me ciklet e kaluara, sipas OECD. Organizata për Bashkëpunim dhe Zhvillim Ekonomik bëri të ditur në një raport se stoku botëror i obligacioneve të kompanive jo-financiare arriti nivelin më të lartë të të gjitha kohërave prej 13.5 trilionë dollarë në vitin 2019.
“Krahasuar me ciklet e mëparshme të kreditit, stoku i sotëm i titujve korporativ të borxhit ka një cilësi më të ulët të kreditit, kërkesa më të larta të ripagimit dhe afate më të gjata të maturimit” , deklaroi Organizata me seli në Paris. Kompanitë jo-financiare kanë marrë hua në sasi rekord në vitin 2019, pas rikthimit të politikave lehtësuese monetare. Organizata theksoi se cilësia dhe përmasa e tregut të borxhit korporativ duhet të merret në konsideratë kur politikëbërësit të konsiderojnë skenaret e mundshme të politikave monetare.
“Këto janë karakteristika që amplifikojnë efektet negative që një përmbysje ekonomike mund të ketë tek sektori korporativ”, deklaroi Organizata. Në çdo vit pas 2010-s, thuajse 20% e titujve të borxhit të korporatave të emetuara nuk kanë qenë në gradë të investimit. Niveli ka arritur në 25% në 2019-n. Organizata për Bashkëpunim dhe Zhvillim Ekonomik theksoi se kjo shënon periudhën më të gjatë që prej vitit 1980 që përmasa e emetimeve jo në gradë investimi ka qëndruar kaq e lartë, ç’ka sugjeron se normat e dështimit të pagesave mund të jenë më të larta në të ardhmen, krahasuar me ciklet e mëparshme të kreditit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.