Cili taksim i duhet shqiptarëve? Haxhi: Propozimet e PD-së s’kanë Ministri Financash. Kraja: Ne besojmë në taksa të ulëta që rrisin zhvillimin
Në emisionin “Argument” është diskutuar përballja e taksave mes propozimeve kryesore të partive. Lidhur me propozimet paraprake të Partisë Demokratike, eksperti dhe ish Zv/Ministri i Financave, Elton Haxhi kritikoi masën e madhe të premtimeve si të parealizueshme.
“Me një llogaritje të thjeshtë më rezulton që nuk përballohen me buxhetin që kemi. Do të bëja një paralelizëm edhe me qeverinë e tanishme. Nëse qeveria e tanishme nuk do kishte një Ministri Financash, mbase as një Kryeministri, por të ishin vetëm Ministritë e linjës që të bënin propozime, të jeni të sigurt që do të vinin me të njëjtat propozime që ka bërë dhe Partia Demokratike. Pra, në finale të gjithë bëjnë propozime, duan fonde në bujqësi, në arsim, duan programe sociale nga të gjitha llojet, por në finale fare, kur vijnë te Ministria e Financave dhe hidhen në Buxhetin e Shtetit, të gjitha fillojnë dhe shkurtohen për të qenë me këmbë në tokë.” – u shpreh eksperti dhe ish Zv/Ministri i Financave, Elton Haxhi.
Në anën tjetër përfaqësuesi i PD, Akil Kraja, e shpjegoi programin si një rrugë drejt taksave të ulëta dhe promovimit të investimeve.
“Nëse ne investojmë në një sistem taksash të ulëta besoj do të kemi një aktivitet më të lartë të investimeve të huaja. Nëse ne kemi një sistem taksash të ulëta, ne besojmë se do të nxisim investimin lokal shqiptar, rritjen e kapacitetit financiar shqiptar dhe së treti, në rast se ne investojmë në bujqësi është sepse ne besojmë te burimet themelore të Shqipërisë. 40% e GDP-së është agroturizmi. Pra, nëse ne investojmë këtu, unë besoj se shumatore e këtyre elementeve është më shumë investime të huaja, rritje e PBB-së, rritje të eksporteve, rritje të pagave, rritje të cilësisë së jetesës. Paga më të larta, kompjuterë për çdo fëmijë që është në pamundësi. Ky është zhvillimi. Zhvillimi vjen duke u investuar, duke u angazhuar, duke marrë vendimmarrje kurajoze, të forta, por dhe të drejta. Nuk mund ta quaj pagën progresive të drejtë për paga-marrësit, kur vetë qeveria e rilindjes e ul në 8%, 2 herë më pak për dividendët.” – tha përfaqësuesi i PD, Akil Kraja.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.