Çmimet bien përpara takimit të OPEC – Karteli pritet të mbajë premtimin. Tërhiqen shqetësimet mbi Omicron
Çmimet e naftës janë tërhequr në tregtinë e së Martës, ndërkohë që investitorët presin që prodhuesit kryesorë në botë të mbajnë premtimet e rritjes së prodhimit gjatë takimit më vonë gjatë ditës. Nafta Brent ra me 25 cent në 78.74 dollarë për fuçi, ndërsa nafta bruto amerikane ra me 19 cent në 75.89 dollarë për fuçi. Të dy çmimet referencë botërorë ishin rritur me mbi 1% ditën e Hënë. Analistët thonë se faktori kryesor që po ndikon tek çmimet botërore të naftës për momentin është manaxhimi i ofertës nga OPEC+.
Sipas ekspertëve, shqetësimet mbi kërkesën për karburant nga përhapja e Omicron po tërhiqen dhe nxjerrja në treg e planifikuar nga rezervat strategjike të naftës është më e vogël se sa pritej. Organizata e Vendeve Eksportuese të Naftës, Rusia dhe vendet aleate, që njihen si OPEC+, do takohet më vonë gjatë ditës. Burimet për Reuters bënë të ditur se karteli pritet të mbajë premtimet e rritjes së prodhimit me 400,000 fuçi në ditë në Shkurt, si çka bërë çdo muaj që prej Gushtit 2021.
Pavarësisht shfaqjes së Omicron dhe ndikimit të mundshëm tek udhëtimet ndërkombëtare, ekonomi si Australia po mbajnë planet e tyre të rihapjes. Aktiviteti i fabrikave u rrit gjithashtu në Azi në muajin e kaluar, ndërkohë që kompanitë e morën lehtë rritjen e rasteve me variantin e ri. Megjithatë, analistët paralajmëruan se OPEC+ mund të ndryshojë kurs nëse rriten tensionet mes perëndimit dhe Rusisë mbi Ukrainën, apo nëse bisedimet mbi programin bërthamor të Iranit bëjnë progres, ç’ka pritet të heqë sanksionet e naftës ndaj vendit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.