Çmimet e banesave u rritën me 13.5% në T3 – BSH: Duhet të monitorojmë ecurinë e çmimeve në tregun e pasurive të paluajtshme
Indeksi i çmimit të banesave për tremujorin e tretë të vitit 2020 është rritur me 13.5% karahsuar me Periudhën paraardhëse, tregojnë të dhënat e publikuara së fundmi nga Banka e Shqipërisë. Rritja duket të jetë ndjeshëm mbi mesataren vjetore të tremujorëve paraardhës, që prej vitit 2002, që fiksohet në 4.8%. Rritja e ndjeshme e çmimit të banesave në rang republike vjen në një kohë që vendi është në një recesion të thellë si pasojë e pandemisë.
Madje, treguesit e Bankës së Shqipërisë flasin edhe për një rritje të qirasë së shtëpive në masën 11.9% gjatë tremujorit të tretë të vitit. Edhe kredia bankare për pasuri të paluajtshme regjistrohet në rritje prej 5.9% gjatë kësaj periudhe kohore. “Është e rëndësishme që ecuria e këtyre dy treguesve, të cilët priren të përforcojnë ecurinë e njëri-tjetrit, të monitorohet në vijimësi.
Qëllimi është që, duke përdorur edhe informacionet që lidhen me ngarkesën me borxh të familjeve, të identifikohen dhe parandalohen situatat në të cilat ecuria e çmimeve në tregun e pasurive të paluajtshme është e paqëndrueshme”-nënvizon Banka e Shqipërisë, duke sinjalizuar kështu se një fryrje e mëtejshme e çmimit të pasurive të paluajtshme në kushtet aktuale, do të ishte e rrezikshme për ekonominë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.