Çmimet e konsumit në SHBA pësojnë rritjen më të shpejtë në gati 40 vjet!

Çmimet në SHBA po rriten me ritmin e tyre më të shpejtë në pothuajse 40 vjet, me inflacionin që u rrit me 7% nga viti në vit në dhjetor. Kërkesa e fortë dhe oferta e pakët për artikujt kryesorë si makinat po nxisin rritjet, të cilat po ushtrojnë presion mbi politikëbërësit për të vepruar.

Banka qendrore amerikane pritet të rrisë normat e interesit këtë vit. Rritja e kostove të huamarrjes synon të reduktojë kërkesën duke i bërë blerjet si makinat më të shtrenjta. Rritja e dhjetorit shënoi muajin e tretë radhazi që norma vjetore e inflacionit të SHBA-së qëndron mbi 6% – shumë në veri të objektivit prej 2% të politikëbërësve. Hera e fundit që ritmi i inflacionit e kaloi atë nivel ishte viti 1982.

Kostot e banesave u rritën me 4.1% nga viti në vit, ndërsa kostoja e sendeve ushqimore u rrit me 6.5% – krahasuar me një mesatare vjetore prej 1.5% gjatë 10 viteve të fundit. Raporti i së mërkurës nga Departamenti i Punës tregoi shenja se disa prej presioneve mund të jenë duke u lehtësuar.

Kostoja e energjisë ra 0.4% nga nëntori në dhjetor – rënia e saj e parë që nga prilli. Por mbi 12 muaj kostot e energjisë janë rritur me gati 30% dhe janë rikthyer në trendin e tyre rritës ditët e fundit.

Presionet e çmimeve që ndodhin në SHBA janë parë në shkallë të ndryshme në mbarë botën. Organizata për Bashkëpunim Ekonomik dhe Zhvillim, e cila përfaqëson më shumë se 30 nga ekonomitë më të mëdha në botë, tha këtë javë se inflacioni midis anëtarëve të saj kishte arritur normën më të lartë në 25 vjet në nëntor. BBC

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.