Çmimet më të shtrenjta në rajon – Eurostat: Shqiptarët i paguajnë ushqimet sa 79% e një europiani
Një ditë më parë të dhënat e Eurostat tregonin se, Shqipëria ka nivelin më të ulët të konsumit për frymë në Europë, sa vetëm 38% e mesatares europiane.
Ndërkohë, të dhënat e reja tregojnë se, Shqipëria është më e shtrenjta në rajon sa i përket çmimit të ushqimeve dhe pijeve jo-alkoolike, gjë që duket se shpjegon përse-në e konsumit më të ulët në Europë. Në vendin tonë, çmimi i këtyre produkteve është sa 79% e mesatares europiane, ndërkohë që për vendet e tjera të rajonit, kjo normë zbret, deri në masën 62% në rastin e Maqedonisë së Veriut.
Në krahasim me vendet e Bashkimit Europian ndërkohë, ne duket t`i paguajmë ushqimet dhe pijet jo-alkoolike më shtrenjtë se një polak, bullgar apo rumun. Ndër nënproduktet, mishi duket të jetë më i shtrenjti në rajon. Në Shqipëri çmimet e mishit janë sa 71% e mesatares europiane, më shumë se çdo vend tjetër në Europë. Çmimi i vezëve, djathit dhe qumështit është gjithashtu më i larti në rajon, dhe thuajse sa ç`është në Europë.
Shqiptarët e paguajnë djathin, vezët apo qumështin sa 94% e një europiani mesatar. Pijet alkoolike ndërkohë, një shqiptar i paguan ekzaktësisht sa një europian mesatar ndërkohë që duhanin e paguan sa 40% e çmimit që duhet të paguajë një europian. Në Europe vendi më i shtrenjtë për ushqimet dhe pijet jo-alkoolike është Norvegjia, që paguan 63% më shumë se një europian mesatar.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.