“Çmitizohen” fitimet e mëdha – Për 2018 pak banka kishin përfitueshmëri të lartë
Përkundrejt shifrave sistemike që tregojnë një sistem bankar mjaft fitimprurës, statistikat në nivel të bankave të veçanta dëshmojnë se rezultatet nuk janë aspak euforike për shumicën e tyre. Mbështetur në shifrat e raportuara përmes Shoqatës së Bankave, shtatë banka e mbyllën vitin me fitim, pesë me humbje, ndërsa dy nuk i kanë publikuar ende treguesit financiarë për vitin e plotë.
Shifrat e raportuara nga Banka e Shqipërisë mbështeten në standardet mbikëqyrëse të kontabilitetit dhe, sipas tyre, fitimi i sistemit bankar vitin e kaluar kishte qenë rreth 18.4 miliardë lekë. Shifrat e publikuara nga vetë bankat mbështeten në standardet ndërkombëtare të raportimit financiar dhe, sipas këtyre shifrave, fitimi i sistemit ishte vetëm 8.2 miliardë, pa përfshirë ende të dhënat e Bankës Amerikane të Investimeve dhe të Bankës së Kreditit të Shqipërisë.
Pjesa dërrmuese e fitimeve ngelet e përqendruar në dy bankat më të mëdha në vend, ndërsa pjesa e tjetër e bankave është në territor të një përfitueshmërie modeste. Fitimet më të larta edhe për vitin 2018 i raporti BKT me 6.3 miliardë lekë, e ndjekur nga Raiffeisen me 3.7 miliardë lekë. Bankat e tjera janë larg dhe e treta rezultoi Union Bank, me një fitim prej 558 milionë lekësh. Credins Bank raportoi 478 milionë lekë fitim, e ndjekur nga Intesa Sanpaolo me 436 milionë lekë, Fibank me 401 milionë lekë dhe Banka e Bashkuar e Shqipërisë me 73 milionë lekë.
Renditjen e palakmuar të humbjeve e kryeson Tirana Bank, me një rezultat negative në vlerën e 1.3 miliardë lekëve. Me humbje e mbyllën vitin edhe ProCredit Bank, me 726 milionë lekë, Alpha Bank, me 692 milionë lekë, Societe Generale me 558 milionë lekë dhe Banka Ndërkombëtare Tregtare, me 66 milionë lekë. Shifrat nuk janë shumë të bujshme edhe në terma të përfitueshmërisë relative. Të vetmet banka që arritën një kthim dyshifror nga kapitali ishin BKT, Union Bank dhe Fibank në kufijtë mes 14% dhe 15%, si edhe Raiffeisen poshtë kufirit të 13%. Për bankat e tjera, përfitueshmëria ishte në nivele modeste njëshifrore.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.