Coeure “tradhëton” Draghin: “Kujdesi i tepruar në normalizim përbën rrezik të madh”
Banka Qendrore Europiane nuk duhet të presë shumë përpara se të vendosë që të eliminojë programin e stimujve, pasi inflacioni të jetë rimëkëmbur, dhe në teori mund të rrisë edhe norma e interesit në rast se do të jetë e nevojshme, deklaroi Benoit Coeure, anëtar i bordit të bankës dhe një ndër zërat më të fuqishëm brenda institucionit.
Me inflacionin tashmë që ka prekur objektivin e bankës, pranë dhe më poshtë se 2%, dhe me ciklin më të fortë të ekonomisë ndër vite, Banka Qendrore Europiane është vënë nën një presion të madh nga Berlini për të hequr dorë nga programi i stimujve dhe për të nisur normalizimin e politikave monetare.
Benoit Coeure, që është një mbështetës i politikave të Mario Draghit, deklaroi se, banka duhet të jetë gati për ta bërë diçka të tillë, pasi në të kundër rrezikon shumë.
“Gradualizimi i tepruar i politikave monetare përmban një rrezik të madh kur të vijë koha që të merret vendimi”, nënvizoi Coeure.
Ndër të tjera, ai shtoi se, Banka Qendrore Europiane nuk duhet të vendosë politikat e saj në varësi të politikës në Europë, duke i`u referuar qartë zgjedhjeve në Gjermani në Shtator dhe në Itali një vit më pas.
Deklaratat e Coeure sinjalizojnë një distancim nga qëndrimet e zëvendës Presidentit të bankës, Vitor Constancio dhe krye ekonomistit Peter Praet, të dy mbështetës të zjarrtë të Mario Draghit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.