Commerzbank, me humbje – Zhgënjen 3 mujori i dytë, prej dobësisë në tregje dhe ristrukturimeve
Banka e dytë më e madhe në Gjermani, Commerzbank, rezultoi në një humbje sipër projeksioneve për tremujorin e dytë, për shkak të dobësisë në tregje dhe kostove të ristrukturimit. Aksionet e huadhënësit ranë me 3% në hapje të sesionit tregtar në Frankfurt.
Humbja neto prej 637 milionë euro ishte më e madhe se 580 milionë që prisnin analistët. Commerzbank deklaroi se pret të kthehet në fitim për vitin e plotë, falë shitjes së aktiveve, si shitja e selisë, që është ndërtesa më e lartë në Gjermani, drejt njësisë së sigurimit të jetës së Samsung.
Commerzbank bëri të ditur se rezultati i dobët për gjysmën e parë të vitit erdhi prej eventeve gjeopolitikë, zgjedhjeve në Europë, një mjedisi të vështirë në tregjet e kapitalit si dhe prej sfidave nga normat e ulëta të interesit.
Banka e dytë më e madhe gjermane pas Deutsche Bank, ka vlerësuar kosto të ristrukturimit prej 807 milionë euro. Fitimi operativ në segmentin e korporatave ra në 235 milionë euro për tremujorin e dytë.
Duke treguar një fuqizim të gjendjes financiare të Commerzbank, raporti i mjaftueshmërisë së kapitalit (CET1) u rrit në 13%, nga 12.5% që ishte në tremujorin e parë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.