Cook shet 5 milionë aksione të Apple – Vlera e tyre arrin në më shumë se 750 milionë dollarë

Shefi ekzekutiv i Apple, Tim Cook, mori më shumë se 5 milionë aksione të kompanisë, duke shitur pjesën më të madhe të tyre për më shumë se 750 milionë dollarë. Sipas marrëveshjes së vitit 2011, kompensimi i Cook do të varej nga performanca e aksioneve të Apple.

Shefi ekzekutiv i Apple, Tim Cook, mori më shumë se 5 milionë aksione të kompanisë, këtë javë, duke shitur pjesën më të madhe të tyre për më shumë se 750 milionë dollarë, sipas një dokumenti të dorëzuar nga Apple pranë Komisionit të Letrave me Vlerë dhe të Këmbimit Valutor në SHBA. Transhi i aksioneve është faza finale e paketës së kompensimit, që Tim Cook mori kur u emërua shef ekzekutiv i Apple 10 vite më parë. vitin e kaluar, Cook mori një tjetër paketë kompensimi që zgjat deri në vitin 2026.

Sipas marrëveshjes së vitit 2011, kompensimi i Cook do të varej nga performanca e aksioneve të Apple, krahasuar me kompanitë e tjera të listuara në indeksin S&P 500. Apple ishte ndër tre kompanitë kryesore me performacën më të mirë, me një kthim të përgjithshëm për aksionerët prej 191.83% gjatë tre viteve të fundit, duke u renditur në vendin e 13 mes 442 kompanive.

Që kur Tim Cook u bë shef ekzekutiv në vitin 2011, aksionet e Apple janë rritur me më shumë se 1200%. Në fillim të javës, Cook dhuroi aksione të Apple me një vlerë prej rreth 10 milionë dollarë për një fondacion bamirësie, ndërsa më herët ka deklaruar se do të dhurojë të gjithë pasurinë e tij për bamirësi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.