Copernicus: Shqipëria regjistron temperatura deri në 2 gradë më të larta – 2020, viti më i nxehtë në histori në Europë

Viti 2020, së bashku me 2016 rezultojnë të jenë vitet më të ngrohta në histori, thotë shërbimi klimatik i Bashkimit Europian, “Copernicus”. Kësaj tendence nuk i ka shpëtuar as Europa, që regjistron në 2020 vitin më të ngrohtë në histori, pas një vjeshte dhe dimri me temperatura ndejshëm më të larta se mesatarja historike. Edhe Shqipëria është pjesë e hartës ku vihen re rritjet e ndjeshme të temperaturave mesatare gjatë vitit të kaluar.

Ashtu si pjesa dërrmuese e Europës, edhe në Shqipëri, temperaturat kanë rezultuar deri në 2 gradë më të larta gjatë vitit të kaluar, krahasuar me periudhën 1981-2010. Vetëm jugu i Shqipërisë dhe verilindja e vendit kanë njohur një rritje më modeste të temperaturave, deri në 1 gradë celcius, thotë studimi i Copernicus. Pjesa më e madhe e Kosovës ndërkohë rezulton gjithashtu me një rritje më modeste të temperaturave.

Në botë, temperaturat rezultojnë 1.25 gradë më të larta se periudha pre-industriale, ndërkohë që 6 vitet e fundit kanë qenë më të nxehtët në histori. Sipas shkencëtarëve në këtë tendencë ka ndikuar mjaft emetimi i gazrave serë, të cilët edhe për 2020-ën kanë vijuar trendin rritës shqetësues. Marrëveshja e Parisit për klimën, pjesë e së cilës është edhe Shqipëria vlerësohet gjerësisht si masa e parë emergjente që duhet ndërmarrë nga shtetet për të frenuar disi ngrohjen globale.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.