Coronabonds “nuk kalojnë” në BE – Zemërimi i Di Maio dhe Patuanelli: “Ata duan që Italia të futet më shumë në borxhe!”

“Shmangia e disa vendeve të Europës Veriore në perspektivën e Eurobondëve, domethënë ndarja e borxhit në një nivel europian, më lë në mëdyshje, për ta thënë atë butë. Unë nuk do të dëshiroja që dikush në Europë të mendojë ta fusë akoma dhe më tepër Iitalinë në borxhe!” Kështu u shpreh Stefano Patuanelli, Ministër i Zhvillimit Ekonomik, në faqen e tij në Facebook pasi Këshilli i BE-së dje nuk gjeti një marrëveshje mbi hipotezën e financimit të përgjigjes ndaj krizës së koronavirusit me Coronabond ose Eurobond.

Edhe Luigi Di Maio u shpreh se “Nëse nuk veprojmë me vendosmëri, ne nuk do të ringjallim ekonominë tonë. Dhe as nuk mund ta imagjinojmë këtë,” në Facebook. “Ne u kemi thënë shteteve të tjera anëtare se Italia do të shpenzojë të gjitha paratë e nevojshme, kjo nuk është koha për të marrë parasysh parametrat, dokumentet dhe burokracinë,” shton ai. Përballë urgjencës ekonomike “ne presim besnikëri nga partnerët europianë. Ne presim që Europa të bëjë pjesën e saj. Kemi biznese, punëtorë dhe familje që kanë nevojë për mbështetje konkrete. Ne duam t’ua japim këtë mbështetje atyre”, shkruan Di Maio.

“Unë dua të jem shumë i qartë: qeveritë kombëtare nuk janë Europë”, thotë Presidenti i Parlamentit Europian David Sassoli. “Ne prisnim një përgjegjësi më të fortë nga drejtuesit. Tani kemi dy javë për të punuar, me shpresën se rezervat do të hiqen dhe përgjigjet do të jepen,” shtoi ai. “Ka institucione europiane që janë duke luftuar për të mbrojtur qytetarët tanë, jetën tonë dhe demokracinë tonë. Askush nuk mund të dalë vetëm nga kjo emergjencë.”(ANSA)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.