CoronaVac, efektive ndaj variantit brazilian / Të dhënat fillestare mbi vaksinën kineze tregojnë mbrojtje ndaj P1
Guvernatori i Sao Paulos, Joao Doria, tha se sipas të dhënave fillestare të një studimi në Brazil, vaksina e Covid-19 e zhvilluar nga firma kineze Sinovac, është efektive ndaj variantit P1 të virusit, të identifikuar në vend.
Komentet e Doria në një konferencë në Sao Paulo, konfirmojnë disa raporte më herët gjatë Javës, që theksonin se studimi kishte testuar gjakun e të vaksinuarve kundër variantit brazilian të virusit.
Coronavac, që është emri i injeksionit të Sinovac, është vaksina kryesore aktualisht që po përdoret për të imunizuar njerëzit në Brazil. Dimas Covas, kreu i institutit të hulumtimeve Butantan, që po prodhon vaksinën e Sinovac, tha se teste të tjera në Kinë kanë treguar efektshmëri edhe ndaj varianteve të Britanisë dhe Afrikës së Jugut. Butantan ka dërguar 16 milionë doza të vaksinës tek Ministria e Shëndetësisë në Brazil, që ka blerë edhe 4 milionë doza të vaksinës së AstraZeneca nga India.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.