Coronavirus, gjëja e parë kur të mbarojë? Janë dy – kafe dhe përqafime!

“Gjëja e parë që do të bëni kur të mbarojë e gjitha kjo?” Një pyetje e thjeshtë por dhe një mesazh shprese që projekton të ardhmen me pozitivitet, një mënyrë për të ndarë sëbashku nevojat, dëshirat dhe ëndrrat normale për një moment tejet të vështirë dhe delikat për të gjithë ne.

Kjo pyetje, në fakt, u shtrua fillimisht nga faqja “Collisioni Festival” – festivali rrok i letërsisë dhe muzikës që zhvillohet në Cuneo të Italisë – e brenda një minute mori me mijëra përgjigje. “Do të kthehem në shtëpi te mamaja ime, ta përqafoj fort dhe të bëjmë xhiro sëbashku përgjatë gjithë ditës”, shkruan një vajzë. “Do të përqafoj të dashurin tim që është larg”, përgjigjet dikush tjetër, “një xhiro në plazh”, “notim në det”, “një akullore në park”, “një kafe në lokal”, janë të tjera përgjigje nga njerëzit, të cilët ndajnë një lum mendimesh dhe dëshirash, që vetëm pak kohë më parë do të cilësoheshin si kaq pak, e ndërsa tani, janë ëndrra të largëta.

Veprime që me bindje, deri dje i merrnim për të mirëqena, i nënvlerësonim, kurse tani, janë gjithçka që njerëzit kërkojnë. “Do të bëj të njëjtat gjëra që bëja deri dje, gjëra të cilat tani, më mungojnë tmerrësisht shumë”, shkruan një tjetër. Shumë të tjerë janë të vendosur që do të shkojnë nëpër spitale për të falënderuar mjekët dhe infermierët. Pyetja e festivalit “Collisioni”, brenda pak minutash ishte në shumë profile, në shumë faqe sociale apo edhe private.

Një shkëmbim fjalësh, biseda të largëta për t’u ndjerë afër, një reflektim mbi atë që deri dje kishim – lirinë – e që sot e kuptojmë se në fakt, paskemi pasur një privilegj të madh. Një ëndërr minimaliste, gjithçka që kërkohet është një kafe dhe përqafime, kur e gjithë kjo të mbarojë, e urojmë, të mbarojë sa më shpejt! /ansa.it/

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.