Covid-19/ Europa nuk ndalet me masat kufizuese! Shkak shifrat e larta të vdekshmërisë gjatë fundjavës
Shifrat gjithnjë e në rritje të viktimave, që humbën jetën për shkak të koronavirusit, gjatë fundjavës, kanë sjellë një shtrëngim të mëtejshëm të masave kufizuese. Zyrtarët europianë, kanë paralajmëruar se janë kundër zbutjes së masave kufizuese për shkak se shpërthimi i koronavirusit mori më shumë se 3,000 jetë njerëzish në Spanjë dhe Itali vetëm, gjatë fundjavës.
Tensionet në sistemet e kujdesit shëndetësor u rritën pasi Spanja deklaroi, se repartet e saj të kujdesit intensiv janë shtrirë përtej kapacitetit dhe një drejtues gjerman i shëndetit publik tha që vendi mund të përballet me mungesë të ventilatorëve. Ndërkohë, lidhur me këtë situatë, përfaqësuesi i kancelares Angela Merkel, tha se jeta publike në ekonominë më të madhe të Europës do të kufizohet për të paktën disa javë të tjera. Italia, e cila ka numrin më të lartë të vdekjeve nga koronavirusi në të gjithë botën, duket se ende vijon të shënojë shifra të larta cdo ditë. Ndërkaq, Spanja regjistroi 838 viktima të dielën, numri më i lartë i arritur ndonjëherë. Të dy vendet së bashku kanë më shumë se pesëfishin e vdekjeve të raportuara në Kinë, vendi ku filloi shpërthimi i Covid-19.
Ndërkohë, me Francën, Italinë dhe Spanjën që kërkojnë burime të barabarta financiare për të përballuar koston ekonomike ministrat e financave pritet të diskutojnë rreth masave që do të ndërmarrin përgjatë kësaj jave.
“Ne kemi nevojë për të zvogëluar lëvizshmërinë dhe t’i kthejmë të gjitha ditët e javës në të Diela,” tha Ministri Spanjoll i Punës, Yolanda Diaz. “Duhet domosdoshmërisht që të gjithë të qëndrojmë në shtëpi.”
Politikanët të shqetësuar për të rindërtuar ekonominë e Europës u përpoqën të sugjerojnë një afat kohor për lehtësimin. Silvio Brusaferro, kreu i institutit të shëndetit publik të Italisë, tha se shifrat më të fundit ofrojnë shenja inkurajuese, megjithëse çdo veprim për të rihapur lëvizjet në vend do të jetë gradual. Kufizimet e tanishme të vendit ka të ngjarë të vazhdojnë deri në përiudhën e Pashkëve, përpara se autoritetet të vlerësojnë çdo lehtësim të rregullave, tha Brusaferro në një intervistë me gazetën “La Repubblica”.
“Përpara së të marrim vendime, duhet të shohim për disa ditë rresht, një ulje të numrit të të prekurve me Covid-19.’’
Ministri gjerman i ekonomisë Peter Altmaier paralajmëroi se është mjaft herët, për të diskutuar lehtësimin e masave kufizuese. Ndërkaq, Helge Braun, shefi i shtabit të Merkel, tha se kufizimet do të zgjasin të paktën deri në 20 prill, plan i cili pritet të rishikohet pas festës zyrtare të Pashkëve.
Elefteria Zguri/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.