COVID-19 “kyçi” gjysmën e bizneseve – Anketa/ 32 % e kompanive do të shkurtojnë stafin për të mbijetuar

Rreth 47% e bizneseve ulën qepenat gjatë  periudhës së emergjencës të shkaktuar nga pandemia e COVID-19 42% vazhduan punën pjesërisht dhe vetëm, 11% nuk e ndërprenë aktivitetin e tyre, pavarësisht situatës. Këto janë të dhënat e anketës “Covid-19 mbi bizneset”e përgatitur nga Sekretariati i Këshillit të Investimeve.

Sipas sektorëve, akomodimi, aktivitetet e zinxhirit ushqimor dhe agjencitë e udhëtimit / operatorët turistikë, të lidhur me turizmin janë më të prekur nga situata COVID-19. Konkretisht , 94% e aktivitetit të turizmit ndaloi punën plotësisht ose pjesërisht. Në të kundërt, sektori i bujqësisë deklaron se është më pak i prekur nga situata e jashtëzakonshme, me specifikisht 24% të kompanive të cilët nuk e ndaluan aktivitetin dhe 57% të cilat pjesërisht e vazhduan aktivitetin. Pavarësisht nga madhësia ose sektori, shumica e kompanive vlerësojnë se ndikimi i  COVID-19 do të zgjasë deri në 1 vit.

Ndërkaq, për të siguruar vazhdimësinë e biznesit, kompanitë deklarojnë se kryesisht do të përdorin të ardhura të mëparshme të akumuluara (34%) si edhe do të ulin kostot (32%) fokus shkurtimi i vendeve të punës ose ulja e prodhimit. Marrja e kredisë në bankë konsiderohet si opsioni i tretë. Më specifikisht nga pikëpamja sektoriale, bujqësia, ndërtimi dhe tregtia konsiderojnë mbështetjen me hua bankare. Ndërsa, industria dhe turizmi fokus do të kenë uljen e kostove ndërsa shërbimet kryesisht do të përdorin të ardhurat e tyre të akumuluara. Pyetësorit iu përgjigjën 833 kompani të shpërndara në të 12 qarqet e Shqipërisë.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.