Covid-19, rekorde të zymta në SHBA/ Mbi 2,000 njerëz ndërrojnë jetë çdo ditë. Spitalet, në mbikapacitet
Për të parën herë që prej fillimit të pandemisë, Shtetet e Bashkuara po raportojnë një mesatare javore prej mbi 2,000 të vdekur në ditë nga Covid-19, sipas të dhënave të Universitetit Johns Hopkins. Mbi 2,600 persona vdiqën nga koronavirusi në Shtetet e Bashkuara në 24 orët e fundit, ndërkohë që ditën e Enjte u prek rekordi ditor prej mbi 2,800 vdekje. Që kur nisi muaji Dhjetor, mbi 2,000 persona kanë vdekur çdo ditë. Shtetet e Bashkuara raportuan mbi 229,000 raste me Covid-19 në 24 orët e fundit, që është një rritje gjigante, ndërkohë që edhe shtrimet në spitale ndodhen në pikën më të lartë gjatë pandemisë.
Drejtori i Qendrës për Kontrollin dhe Parandalimin e Sëmundjeve, Robert Redfield, tha se Dhjetori, Janari dhe Shkurti do të jenë muaj të vështirë. “Unë mendoj se do jetë periudha më e vështirë në historinë e shëndetit publik të këtij vendi, kryesisht prej presioneve që do ketë tek sistemi i kujdesit shëndetësor”- tha Redfield. Në një paralajmërim të zymtë gjatë javës që kaloi ,Presidenti i zgjedhur Joe Biden, tha se 250,000 persona të tjerë pritet të ndërrojnë jetë nga Covid-19 deri në Janar, pasi njerëzit nuk po kushtojnë vëmendje. Për të parandaluar përhapjen, Biden tha se do ta bëjë të detyrueshme vendosjen e maskave në të gjithë pronat federale dhe transportin ndërshtetëror, menjëherë sa të betohet. “vetëm 100 ditë me maska. Jo përgjithmonë, 100 ditë!”- tha Biden.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.