CR7, përfitime për sponsorët – Jeep pritet të rrisë shitjet, edhe Adidas, Samsung dhe Allianz gëzojnë

Kalimi i Cristiano Ronaldos te Juventus është pagëzuar nga mediat italiane si “Goditja e shekullit”. Operacioni është më i madhi në historinë e futbollit italian, pasi kap një kosto prej rreth 300 milionë eurosh në total. Por, fitimet llogariten të jenë të mëdha për klubin bardhezi, dhe jo vetëm.

Fiat Chrysler, nën pronësinë e familjes që ka edhe klubin italian, është sponsor zyrtar i juventusit, duke reklamuar markën e makinave Jeep, pjesë e grupit të tyre. Pikërisht Jeep do të jetë e stampuar edhe në fanellën e Cristiano Ronaldos, i cili është një makineri e padiskutueshme marketingu.

Nëse Ronaldo do t`i japë Juventusit ligën e kampionëve vetëm fitimet nga  kontratat mediatike do të jenë në 58.3 milionë euro, çka është një fitim domethënës po të llogarisësh 20 milionë eurot që Fiat Chrysler paguan çdo vit si sponsor zyrtar.

Jeep ndërkohë projekton shitje në 1.9 milionë njësi këtë vit, më shumë se dyfishi i 5 viteve më parë, ndërkohë që Sergio Marcchione, kreu ekzekutiv i kompanisë, kërkon që shifra të ngjitet në 3.3 milionë në 2022. Këtë shifër mund ta nxisë Cristiano Ronaldo, sidomos me fansat hispanikë të tij, të cilët mund të shtyhen për të blerë markën e famshme të makinave.

Edhe sponsorët e tjerë të Juventus, si Adidas, Allianz dhe Samsung, pritet të korrin përfitime nga goditja e shekullit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.