Credins, bashkëpunim me UET – Në mbështetje të studentëve për tregun e punës

Credins Bank në bashkëpunim me Universitetin Europian të Tiranës u vjen në ndihmë studentëve për përgatitjen e tyre sipas kërkesave të tregut në sektorin bankar. Përfaqësues të UET kërkuan bashkëpunim  për përcjelljen e risive  dhe mundësi  për praktika në  këtë institucion, gjë e cila është mirëpritur nga përfaqësuesit e Credins.

“Duam që studentët tanë të kenë mundësinë të kryejnë praktikat pranë këtyre institucioneve dhe bizneseve. Pra, në momentin që ne kryejmë këtë marrëveshje duam që këtë studentë t’i akomodojmë pranë këtyre institucioneve dhe të bëjnë praktikat e tyre. Normalisht, praktika nuk është vetëm diçka forma, por praktika konsiston në atë që studenti pajiset me këto njohuri praktike dhe më pas bën diplomën, kryen kërkimin e tij shkencor në programet master”, u shpreh Orkida Ilollari, drejtore e programeve master pranë UET.

Presidenti i UET Ardian Civici i propozoi  përfaqësuesve të Credins, që aktivitetet në javën e parasë të jenë manifestim për edukimin financiar dhe bankar.

“Unë mendoj që të organizojmë edhe një aktivitet më të hapur ku ju të jeni si bankë prezente, qoftë për të folur me studentët, për t’i shpjeguar të gjithë zhvillimet dhe produktet e reja bankare që mund të jenë të dukshme por larg publikut për t’i konceptuar. Dhe mund ta bëjmë në një lloj manifestimi të edukimit financiar dhe bankar, një aktivitet më të gjerë, jo thjesht një ardhje në auditor, qoftë me një stendë, qoftë me prezantime me video, me kurse të mëdha studentësh”, tha Civici.

Credins Bank në mbështetje të studentëve nuk ofron vetëm bashkëpunime për përcjelljen e njohurive dhe risitë në fushën bankare por edhe kredi me kosto të ulëta si edhe sigurim jete falas.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.