“Credins” publikon raportin vjetor 2020 – Pavarësisht pandemisë, rritje e përformancës dhe rol kyç në përballimin e krizës
Credins Bank ka bërë publik raportin vjetor të vitit 2020, që përkon edhe me periudhën kur pandemia globale goditi me forcën më të madhe ekonominë shqiptare. Në nisje të raportit, Drejtori i Përgjithshëm i Credins Bank, Maltin Korkuti vendos theksin te fakti se, viti 2020 ka qenë një vit mjaft sfidues në shumë aspekte. “Përtej vështirësive të jashtëzakonshme me të cilat u përballëm, Banka Credins arriti të ruajë një performancë të kënaqshme, duke realizuar me sukses një pjesë të objektivave strategjike dhe duke ruajtur një pozicion të shëndetshëm të likuiditetit, kredisë me probleme, rritje të ardhurash dhe konsolidim të mëtejshëm të marrëdhënieve me klientët.
Masat e shpejta dhe të suksesshme të ndërmarra, reflektuan një performancë paraprake pozitive kundrejt ‘19. Credins Bank e mbylli ‘20 duke vazhduar të ruajë vendin e parë në treg për totalin e portofolit neto të kredisë me një rritje prej +4% në ’20 përkundrejt ’19. Në këtë vit specifik, kredidhënia u fokusua kryesisht në sektorë strategjikë si shëndetësia, po dhe në mbështetje të bizneseve të vogla e të mesme për të gjallëruar aktivitetin e tyre, kapërcyer vështirësitë e krijuara dhe për të rifilluar me optimizëm”, nënvizon Drejtori i Përgjithshëm i Bankës Credins. Sukses tjetër në një vit të vështirë si 2020 vlerësohet edhe liçensimi i bankës nga ana e Bankës së Shqipërisë për tre aktivitete të reja: tregtimin e derivative, nënshkrimin e titujve (underwriting), si dhe këshillimin për aktivitete të caktuara. Banka Credins ka luajtur gjithashtu një rol kyç në mbështetjen e qeverisë shqiptare në ankandin e letrave me vlerë, duke i siguruar kështu fonde për të përballuar pandeminë.
Shifrat tregojnë një rritje në shumë aspekte të aktivitetit të bankës gjatë vitit 2020, me një rritje prej 62% të përdoruesve të Credins online, si dhe me 88% të numrit të transaksioneve, rrjedhojë e drejtpërdrejtë e pandemisë. Pranë 11.2% vlerësohet rritja vjetore e portofolit të kredisë retail, dhe me rreth 14% vlerësohet rritja vjetore e klientëve institucional. Rritja e aktivitetit të ndërmjetësimit në sigurime raportohet pranë 18%, ndërsa pranë 5% është rritja e Credins Leasing. Depozitat bankare janë rritur me 8%, ndërsa përdorimi i kartave me rreth 59%. Pavarësisht se 2020 ka qenë një vit mjaft i vështirë në tërësi, veçanërisht për tregun e punës, Banka Credins raporton një rritje të punonjësve me 5% krahasuar me vitin paraardhës.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.