“Çudi” në Vlorë/ 10 persona kapen duke luajtur futboll! Mes tyre dhe shefi i policisë. Gjobiten dhe detyrohen të futen në karantinë
Policia e Shtetit njofton se ka gjobitur 10 persona në Vlorë të cilët kishin thyer orarin e karantinës për të luajtur futboll. Referuar njoftimit zyrtar, personat u kapen duke luajtur futboll në Pyllin e Sodës në Vlorë dhe veç gjobës, ata duhet të karantinohen për 14 ditë dhe do të mbahen në mbikëqyrje nga ana e policisë.
Në listën e personave që është kapur duke luajtur futboll është edhe Shefi i Seksionit të Qarkullimit Rrugor në Drejtorinë Vendore të Policisë Vlorë, i cili me urdhër të Drejtorit të Përgjithshëm është pezulluar nga detyra.
Gjithashtu, nga Drejtoria e Standardeve Profesionale në Policinë e Shtetit nisi hetimi disiplinor për shkelje të rëndë, si dhe u bë pezullimi nga detyra i një punonjësi Policie për mospërmbushje apo dështim në përmbushjen e detyrave ose përgjegjësive të caktuara, pasi konstatoi personat dhe nuk mori masë administrative ndaj këtyre shtetasve.
Policia e Shtetit falenderon qytetarët për bashkëpunimin dhe apelon edhe njëherë për qëndrim në banesë dhe respektim të masave kufizuese, duke bërë të mundur parandalimin e përhapjes së COVID-19.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.