Daimler, BMW, Porsche dhe Ford bashkohen për ndërtimin e pikave të karikimit të makinave me bateri elektrike

Tre prodhues gjermanë të automjeteve: Daimler (Mercedes-Benz), BMW dhe Porsche, së bashku me prodhuesin amerikan Ford do të nisin një sipërmarrje të përbashkët (joint venture) në Europë.

Komisioni Europian i ka dhënë dritën jeshile kërkesës së kompanive, e cila do të instalojë, operojë dhe mirëmbajë një infrastrukturë për karikimin e makinave me bateri elektrike në disa vende të Unionit.

400 pika të karikimin super të shpejtë do të ndërtohen kështu nëpër Europë, duke krijuar një rrjet mbështetës për automjetet elektrike me bateri, i cili do të mbulojë rrugë me distanca të gjata.

Nivelet e fuqisë deri në 350 kW do të ulin ndjeshëm kohën e karikimit, krahasuar me sistemet ekzistuese. Rrjeti do të bazohet në standardin e Sistemit të Karikimit të Kombinuar, i cili është i përshtatshëm me shumicën e automjeteve me bateri aktuale dhe të gjeneratave në vijim.

Ndërtimi i këtyre pikave do të nisë këtë vit me synim kryesor prej 400 pikash karikimi. Deri në 2020, klientët do të kenë akses në mijëra pika të tilla, të cilat e bëjnë karikimin po aq të lehtë sa mbushja me karburant.

Komisioni gjykoi se kjo sipërmarrje nuk do të ngrejë shqetësime konkurrence, për shkak të impaktit të limituar në treg.

Krijimi i kësaj strukture do të shërbejë si shtysë për konsumatorët europianë që të blejnë makina elektrike. Daimler synon që deri në 2025 të ketë 25 modele makinash elektrike.

4 kompanitë do të jenë partnerë të barabartë në sipërmarrjen e përbashkët, por inkurajojnë edhe prodhues të tjerë automjetësh të bashkëpunojnë për ngritjen e rrjetit.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.