‘Dalja’ e Italisë nga Euro? – Tria: Koalicioni i angazhuar të qëndrojë brenda monedhës së përbashkët

Qeveria e re e Italisë nuk ka ndërmend të largohet nga euro dhe planifikon të përqendrohet në uljen e nivelit të borxhit. Deklarata ka ardhur të dielën nga ministri i Ekonomisë, Giovanni Tria, i cili tha se koalicioni është i angazhuar të qëndrojë brenda monedhës së përbashkët.

“Pozicioni i qeverisë është i qartë dhe unanim, nuk ka asnjë arsye për të lënë euron,” tha ai.

Në intervistën e tij të parë që pas marrjes së detyrës, Tria tha për gazetën ‘Corriere della Sera” se koalicioni po përpiqet të nxisë rritjen përmes investimeve dhe reformave strukturore.

Sipas ministrit, rritja ekonomike dhe punësimi janë edhe qëllimet kryesore të qeverisë, e cila po përpiqet të reduktojë nivelin e borxhit.

“Qëllimi ynë është rritja dhe punësimi. Por, ne nuk planifikojmë rritjen me shpenzimet e deficitit. Këto do të jenë plotësisht koherente me objektivin për të vazhduar në rrugën e uljes së raportit të borxhit”, tha Tria, duke shtuar se do të paraqiste parashikimet e reja ekonomike dhe qëllimet e qeverisë në shtator.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.