“Dalja e pastër” e Greqisë – Kreditorët diskutojnë lehtësimin e borxhit, nuk flitet për zgjatjen e programit
Fondi Monetar Ndërkombëtar dhe Eurozona po diskutojnë alternativa për lehtësimin e borxhit në të ardhmen për Greqinë, por nuk kanë konsideruar ndonjë zgjatje në kohë të programit të shpëtimit.
“Nuk ka bisedime për një zgjatje të programit të Greqisë. Autoritetet vendase janë fokusuar në daljen nga programi dhe përfundimin e kësaj ndihme deri në muajin Gusht”, tha Mario Cetnteno, kreu i ministrave të Financave të Eurozonës.
Ai po i përgjigjej spekulimeve se Greqia mund të marrë një linjë speciale të kreditit nga fondi i shpëtimit të Eurozonës pasi të përfundojë programin më datë 20 Gusht, në mënyrë që të jetë më e varur nga humori i tregjeve.
Megjithatë, Greqia nuk kërkon një linjë të tillë të kreditit për shkak se do të vijë me kushte. Heqja e kontrollit të Eurozonës do të shihej si një arritje politike për qeverinë e majtë të kryeministrit Alexis Tsipras.
Irlanda, Spanja, Portugalia dhe Qipro, që kanë marrë secila programe të shpëtimit nga Eurozona në të shkuarën, kërkuan një linjë të tillë të kreditit, duke krijuar atë që në Bashkimin Europian quhet “dalje e pastër’.
Megjithatë, Komisioneri për çështjet ekonomike dhe financiare, Pierre Moscovici, tha se Greqisë i duhet një marrëveshje e re me kreditorët e Eurozonës, për të siguruar disiplinën në buxhet dhe se reformat do të vazhdojnë të zbatohen.
Greqia ka marrë hua më shumë se 200 miliardë euro nga qeveritë e Eurozonës në 3 programe të rëna dakord dhe disa huadhënës shqetësohen se Athina mund të mos paguajë kreditë në të ardhmen, apo se do të ndalojë zbatimin e reformave dhe do t’i kthehet përsëri trazirave ekonomike.
Pasi Greqia të dalë nga programi i shpëtimit, do të rifitojë sovranitet në ndërmarrjen e politikave fiskale, duke mos pasur më mbikëqyrjen e ashpër të kreditorëve.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.