“Dalja nga NATO, e panevojshme” – Trump thotë se aleatët kanë premtuar të rrisin shpenzimet në mbrojtje
Presidenti i Shteteve të Bashkuara, Donald Trump tha se aleatët e NATO-s kanë premtuar të rrisin shpenzimet në mbrojtje përtej nivelit prej 2% të Produktit të Brendshëm Bruto, pas një përplasjeje publike me anëtarët kryesorë. “NATO është shumë më e fortë se sa ka qenë 2 ditë më parë”, tha Trump. Presidenti amerikan pohoi se aleatët e NATO-s kanë bërë angazhime për të rritur shpenzimet e tyre në mbrojtje, pasi tha se mund të tërhiqet nga aleanca pa nevojën e miratimit nga Kongresi.
Trump shtoi më vonë se kjo nuk do të jetë e nevojshme, për shkak se aleatët kanë rënë dakord që të rrisin shpenzimet. Trump ka kritikuar prej kohësh Berlinin dhe vende të tjera aleate, për shfrytëzimin e kapacitetit të Washingtonit në mbrojtje. Aktualisht vetëm 5 vende nga 29 anëtarët e Organizatës kontribuojnë në nivelin objektiv prej 2% të PBB. Këtu përfshihen Shtetet e Bashkuara, Mbretëria e Bashkuar, Greqia, Estonia dhe Polonia.
Në muajin Maj, Gjermania premtoi të rrisë shpenzimet ushtarake në 1.5% të PBB deri në 2025-ën, nga niveli i ulët prej 1.1% që ishte në 2015-ën. Sapo mbërriti në kryeqytetin e Belgjikës, Trump akuzoi publikisht Gjermaninë, se është “totalisht e kontrolluar” nga Rusia, pasi marrëveshjet e naftës dhe gazit i kishin dhënë Moskës shumë influencë në ekonominë më të madhe të Europës. “Patëm një takim shumë intensiv”, tha Kancelarja gjermane Angela Merkel.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.