Danimarka bëhet vendi i parë që ndalon programin e saj të vaksinimit kundër Covid!

Danimarka është bërë vendi i parë që ka ndaluar programin e saj të vaksinimit kundër Covid, duke thënë se po e bën këtë sepse virusi tani është nën kontroll. Fushata e vaksinimit ndaj Covid në Danimarkë filloi menjëherë pas Krishtlindjeve në 2020. Rreth 4.8 milionë qytetarë janë vaksinuar, tha autoriteti shëndetësor, me mbi 3.6 milionë njerëz që morën një vaksinë përforcuese.

Në të njëjtën kohë, shumë njerëz janë infektuar që kur varianti omicron u bë lloji dominues i virusit, që do të thotë se nivelet e imunitetit në mesin e popullatës janë të larta. Publiku mund të vaksinohet ende gjatë pranverës dhe verës nëse dëshiron, dhe se vendet e vaksinimit do të mbeten të hapura në të gjithë vendin. Imunizimi u rekomandohet ende njerëzve për të cilët Covid paraqet një rrezik të shtuar, siç janë ata mbi moshën 40 vjeç dhe për gratë shtatzëna të pavaksinuara.

Lëvizja e Danimarkës për të pezulluar programin e saj të vaksinimit vjen pasi situata Covid në të gjithë botën mbetet e përzier. Europa dhe SHBA-ja kanë braktisur shumicën e kufizimeve për Covid-in, por Kina ende po imponon (ose po shqyrton) bllokime pasi virusi përhapet në qytete të mëdha si Shangai dhe Pekini. Megjithatë, larg anulimit të programit të tij të vaksinimit krejtësisht, Autoriteti Danez i Shëndetit dhe Ilaçeve tha se ndoshta do të ketë nevojë për të vaksinuar kundër Covid-19 përsëri në vjeshtë, pasi virusi vazhdon të ndryshojë.

Variante të reja janë shfaqur gjatë rrjedhës së pandemisë, e cila tani është në vitin e saj të tretë. Këto kanë gërryer efikasitetin e vaksinave kundër Covid që u zhvilluan në kohë rekord në vitin 2020, megjithëse vaksinat e autorizuara për përdorim në Perëndim mbeten efektive në parandalimin e infeksionit të rëndë, shtrimit në spital dhe vdekjes nga Covid-19.

Me programin e vaksinimit që ka të ngjarë të rifillojë pas disa muajsh, ekspertët shëndetësorë të Danimarkës do të shqyrtojnë se kush duhet të vaksinohet, kur duhet të bëhen vaksinat dhe cilat vaksina duhet të përdoren. Autoriteti Danez i Shëndetit dhe Ilaçeve tha se do të vazhdojë të ndjekë nga afër zhvillimin e epidemisë dhe është gati të rifillojë përsëri përpjekjet e vaksinimit nëse ka nevojë për imunizimin e grupeve të tjera të synuara përpara vjeshtës. CNBC

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.