DASH “nxin” klimën e investimeve – Korrupsion dhe favorizime kompanive të lidhura me politikën, problem PPP-të
Në sytë e investitorëve të huaj, Shqipëria mbetet një vend i vështirë për të bërë biznes. Raporti i Departamentit Amerikan të Shtetit mbi klimën e investimeve ne vendin tonë, pasqyron raportimet e investitorë, të cilët shprehin shqetësime për ndryshimin e shpeshtë të legjislacionit dhe vështirësinë në interpretimin e tij, duke e cilësuar si një formë që ligjvënësit përdorin për të favorizuar kompanitë e lidhura me politikën.
Gjithashtu, ata thonë se ndryshimet bëhen pa konsultime me komunitetin e biznesit. Ndërkohë që investitorët e mëdhenj të huaj raportojnë presion për të punësuar nënkontraktorë të lidhur me politikën si dhe shprehin shqetësimin rreth përputhshmërisë me Aktin e Praktikave të Korruptimeve të Huaja gjatë operimit në Shqipëri. “Raportet e korrupsionit në prokurimin e qeverisë janë të zakonshme”, vijon më tej raporti, teksa shton se përdorimi në rritje i kontratave të partneritetit publik privat ka ngushtuar mundësitë për konkurrencë, duke përfshirë edhe investitorët e huaj, në infrastrukturë dhe sektorë të tjerë.”
Gjithashtu, DASH kritikon analizat e dobëta kosto-përfitim dhe mungesën e ekspertizës teknike në hartimin dhe monitorimin e kontratave PPP, duke i cilësuar si shqetësime të vazhdueshme. Në fund të raportit, Departamenti Amerikan i Shtetit bën me dije se energjia, turizmi, furnizimi me ujë dhe kanalizimet, infrastruktura rrugore dhe hekurudhore, minierat dhe teknologjia e komunikimit të informacionit paraqesin perspektivat më të mira për investimet e huaja direkte në Shqipëri gjatë viteve të ardhshme.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.