De Guindos për Katalonjën – “Qeveria rajonale duhet të fajësohet për eksodin e firmave nga vendi”

Ministri i Financave i Spanjës, Luis De Guindos, ka fajësuar qeverinë e Katalonjës për zhvendosjen e bazave të kompanive jashtë rajonit, ndërsa kolegët e tij të Eurozonës hodhën poshtë ndikimin e krizës politike të Spanjës në valutën e përbashkët.

Në javët e fundit, disa kompani dhe banka në Katalonjë, kanë transferuar bazat e tyre ligjore jashtë rajonit pas referendumit mbi pavarësinë që qeveria në Madrid u përpoq ta ndalojë.

Luis de Guindos tha se dalja e shumë kompanive nga Katalonja është pasojë e politikave “iracionale” dhe “radikale” të qeverisë rajonale. Duke i’u drejtuar investitorëve, ministri tha se pavarësia e Katalonjës nuk ka për të ndodhur.

Pjesa më e madhe e ministrave gjatë takimit në Luksemburg, refuzuan që të tërhiqen në diskutim, por ministri gjerman i Financave, Wolfgang Schaeuble, tha se ligji dhe kushtetuta duhet të mbizotërojë në Spanjë.

Komisioneri mbi çështjet ekonomike dhe financiare, Pierre Moscovici, tha se duhet arritur një zgjidhje nëpërmjet dialogut, ndërsa pyetej mbi ndikimin ekonomik të këtij eventi.

Spanja është përpjekur që të qetësojë investitorët ndërkombëtar mbi situatën politike në vend.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.