Debate për “3 lëndë në 6 orë” – Vokshi: Duhet korrektësi, të shtyhet zbatimi i nismës
Dështon për herë të dytë seanca dëgjimore me ministren e Arsimit Lindita Nikolla, për nismën “3 lëndë në 6 orë”, ndërkohë që kanë mbetur vetëm dy ditë nga vënia në zbatim e saj.
Kryetarja e komisionit të edukimit dhe mjeteve të informimit publik, njëkohësisht deputete e PD, Albana Vokshi u shpreh se shkollat nuk janë ende gati për këtë nismë e cila pretendohet të rris cilësinë në arsim dhe të lehtësojë nxënësit me çantat e shkollës.
Vokshi nëpërmjet një deklarate për mediat kërkon shtyrjen e zbatimit të saj për të mundësuar një konsultim të gjerë.
“Ne mendojmë që është një nismë e parakohshme, është një nismë e cila do të çorientonte gjithë sistemin arsimor parauniversitar, është një nismë e pakonsultuar, e pa menduar dhe e pa bazuar në asnjë model të ndonjë vendi, jo vetëm të rajonit, as të Europës dhe më gjerë. Dëshira e gjithë deputetëve të komisionit të kërkojmë që kjo nismë të mos fillojë më datën 1 Shkurt”.
Por për deputetin e mazhorancës Fidel Ylli ndërprerja e seances ishte e pajustifikueshme. Edhe pse në limitet kohore, seanca dëgjimore me ministren Nikolla u shty për ditën e mërkurë.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.