Debate për kostot e PPP-ve – Roshi: Përjashtuar kompanitë e huaja me kapital. Balluku “tërheq” pagesën e Tiranë-Durrës
Deputeti Artur Roshi ka akuzuar qeverinë se po akumulon një borxh të madh, përmes nënshkrimit të kontratave të partneritetit publik privat për ndërtimin e rrugëve. Gjatë një interpelance të kërkuar me ministren e Infrastrukturës dhe Energjisë, Belinda Balluku, deputeti kërkoi shpjegime për format e përzgjedhjes së tyre, si dhe për kompanitë fituese pa kapital të mjaftueshëm për të kryer investime, duke përjashtuar investitorët e huaj, që s’do kishin nevojë për marrje kredie.
Gjithashtu, skema e mirëmbajtjes së rrugëve, e përfshirë në kontratat e reja PPP, sipas deputetit është problematike. Po ashtu, Roshi kërkoi shpjegime edhe për vendosjen e pagesës për autostradën Tiranë-Durrës, por ministrja Balluku deklaroi se ende projekti është në fazë studimi dhe nuk është vendosur nëse ai do të aplikohet, duke tërhequr deklaratat e mëparshme se në vjeshtë do të hapet gara për dhënien me koncesion të këtij aksi.
Pak ditë më parë Komisioni parlamentar I Ekonomisë dhe Financave miratoi 2 kontratat e partneriteti publik privat për akset Milot-Balldren dhe Orikum-Dukat, me një vlerë totale prej 281 mln euro, pa TVSH.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.