Debatet për origjinën e COVID-19 – Boris Johnson nuk beson se virusi doli nga laboratori kinez në Wuhan

Kryeministri britanik Boris Johnson në një intervistë për CBC News në Kanada tha se ai nuk beson se virusi COVID-19 doli nga një laborator kinez në provincën Wuhan, por po monitoron provat e reja që po publikohen.

“Deri më tani, provat që kam parë nuk sugjerojnë që të ketë një dalje të virusit nga laboratory. Gjërat që kam parë sugjerojnë që për momentin, i dyshuari numër një për origjinën e kësaj sëmundjeje është ende një sëmundje me origjinë nga kafshët e egra”, tha Johnson.

Presidenti amerikan Joe Biden urdhëroi ndihmësit e tij për të gjetur përgjigje për origjinën e virusit që shkaktoi COVID-19, duke thënë së fundmi se agjencitë e inteligjencës amerikane po ndjekin teori rivale duke përfshirë mundësinë e një aksidenti laboratorik në Kinë.

Sipas Biden, agjencitë e inteligjencës po shqyrtojnë dy skenarë të mundshëm, por ende nuk kanë besim të fortë në konkluzionet e tyre dhe po debatojnë shumë.

Përfundimet u hartuan në një raport për Biden, i cili i kërkoi ekipit të tij në mars të detajonte nëse koronavirusi “doli nga kontakti njerëzor me një kafshë të infektuar apo nga një aksident laboratorik”.

Zbulimi i pazakontë i Biden për publikun rreth vlerësimeve jopërfundimtare të inteligjencës amerikane zbuloi një debat që po zhvillohej brenda administratës së tij se ku lindi koronavirusi i ri.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.