Debati për Ministrin e Brendshëm – Rama propozon të njëjtin emër, Meta i vendosur të mos e dekretojë
Vetëm pak ditë nga refuzimi që bëri kreu i shtetit për propozimin e kryeministrit Edi Rama për të emëruar në krye të Ministrisë së Brendshme Sandër Lleshin, kryeministri njofton sërish përmes Twiter-it se ka rifirmosur të njëjtin emër që do ti dërgohet sërish presidentit Ilir Meta por kësaj here edhe një relacion i detajuar shpjegues.
“Sapo kam rifirmosur për ridërgim kërkesën për dekretimin e Sandër Lleshit Ministër i Brendshëm, drejtuar Presidentit të Republikës. Bashkëngjitur do t’i dërgohet Presidentit edhe një relacion i detajuar shpjegues, në funksion të dekretimit të Ministrit të Brendshëm”, shkruan Rama.
Vetëm pak momente më parë kreu i shtetit Ilir Meta, në një prononcim për mediat, la të kuptohej se nuk ka ndryshuar qëndrim as këtë herë.
Këtë situatë kontradiktore mes presidentit dhe kryeministrit, për emërimin e ministrit të brendshëm, e ka komentuar edhe raportuesi për Shqipërinë në Parlamentin Europian, Knut Fleckenstein.
Edhe në këtë rast Presidenti i Republikës ka 7 ditë afat për dekretimin ose mosdekretimin e emrit të propozuar nga kryeministri për kreun e Ministrisë së Brendshme.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.