Dëbora bllokon edhe minierat në veri të Shqipërisë – 82 shkolla nuk zhvillojnë mësim

Reshjet e dendura të dëborës që kanë përfshirë vendin, krahas bllokimit të disa rrugëve në veri të vendit dhe vështirësimit të kalimit me zinxhirë në disa akse, ka shkaktuar edhe bllokime të tjera dhe izolimin e disa fshatrave.

Raportimet e fundit që vijnë nga disa prej minierave të kromit e të bakrit flasin për trashësi të larta bore që kanë bllokuar hyrjen e minierave. Për rrjedhojë është bërë edhe bllokimi i punës në minierat në Zonën D dhe Martanesh.

Erërat e forta ndërkohë kanë shkaktuar dëmtime në disa centrale energjetike, duke sjellë mungesë të energjisë elektrike në disa zona rurale.

Ditën e djeshme, për shkak të reshjeve të dëborës në zonat veriore dhe verilindore, si dhe për shkak të shirave në zonën jugore, rreth 82 shkolla në të gjithë vendin nuk kanë zhvilluar procesin mësimor. Drejtoritë Arsimore më të prekura nga moti janë Mat, Pogradec, Dibër, Berat, Librazhd dhe Bulqizë.

Në Bulqizë, dëbora ka bërë që rruga Bulqizë-Peshkopi dhe Bulqizë-Burrel të kalohet vetëm me zinxhirë, ndërsa të bllokuara janë tashmë rrugët Qafë e Buallit-Zona D, Bulqizë-Krastë dhe Ura e Çerenecit-Stëblevë.

Probleme raportohen edhe në Peshkopi. Rruga Peshkopi-Qafa e Buallit, Peshkopi-Sllovë-Kukës, janë të kalueshme vetëm me zinxhirë, ndërsa shumica e njësive administrative janë të bllokuara. Në Zall-Dardhë mungon energjia elektrike.

Ditën e sotme, me intensifikimin e reshjeve pritet që të raportohen më shumë rrugë të bllokuara dhe më shumë shkolla të mos kryejnë procesin mësimor.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.