Deficiti tregtar në rënie! 10% më pak për shtatë muajt e parë të vitit
Rritja e aktivitetit të tregtisë së jashtme po e rrit gradualisht deficitin tregtar të vendit. Sipas Instat, gjatë korrikut deficiti u rrit 10% në raport me qershorin. Megjithatë, gjatë muajve të krizës bilanci i tregtar i vendit është përmirësuar.
Për 7-mujorin, deficiti tregtar ishte 178 miliardë lekë, në rënie me 10% krahasuar me të njëjtën periudhë të vitit të kaluar. Në një analizë të vetën, Banka e Shqipërisë vlerëson se ngushtimi i deficitit tregtar është faktori me ndikimin kryesor në ruajtjen e stabilitetit të kursit të këmbimit mes euros dhe lekut. Këtë vit, leku nuk regjistroi ndonjë mbiccmim të ndjeshëm gjatë sezonit të verës, ndryshe nga tendenca e viteve të mëparshme. Kjo besohet se ka ndodhur për shkak të uljes drastike të të ardhurave nga turizmi. Por, ngushtimi i deficitit tregtar duket e ka balancuar pjeërisht efektin negativ të turizmit në bilancin e përgjitihshëm të llogarisë korrente.
Importet vijuan rritjen në muaj korrik, me afërsisht 8% më shumë krahasuar me qershorin, por ishin sërish më të ulëta krahasuar me një vit më parë. Në shtatë muaj, Shqipëria ka importuar mallra për një vlerën 13% më të ulët krahasuar me të njëjtën periudhë të vitit të kaluar. Ky është faktori me ndikimin kryesor në uljen e deficitit tregtar të vendit. Rënia e importeve ka prekur të gjithë grupmallrat, me përjashtim të produkteve ushqimore. Kjo reflekton efektin e krizës në ecurinë e aktivitetit ekonomik dhe në kërkesën e brendshme.
Edhe eksportet kanë një tendencë të ngjashme, me jë përmirësim gradual muaj pas muaji, por duke ngelur në nivele më të ulëta krahasuar me vitin e kaluar.
Për korrikun, rënia me bazë vjetore krahasimi ishte afërsisht 12%, ndërsa për gjithë 6-mujorin e parë të vitit rënia e eksporteve arriti në kufijtë e 17%.
Kriza ka goditur rëndë ato grupmallra që mbajnë peshën kryesore në eksportet shqiptare, si produktet e sektorit fason, lëndët e para dhe materialet e ndërtimit. Grupi “tekstile dhe këpucë” ka pësuar rënie me 21%, “minerale lëndë djegëse, energji” me 22% dhe “materiale ndërtimi dhe metale” me 26%.
Për shtatë muajt e parë të vitit rritje të eksporteve regjistruan vetëm produktet ushqimore, por edhe ato të makinerive e pajisjeve.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.