Defiçiti tregtar në SHBA – Rritet në nivelin më të lartë në 9 vite e gjysmë gjatë Shkurtit
Defiçiti tregtar i Shteteve të Bashkuara u rrit në nivelin më të lartë në 9 vite e gjysmë gjatë Shkurtit, me importet dhe eksportet që u rritën në nivele rekord të larta prej fuqizimit të kërkesës brenda vendit e asaj globale.
Administrata e presidentit Donald Trump ka caktuar tarifa në importe për të ulur defiçitin dhe mbrojtur industritë vendase nga konkurrenca e padrejtë nga jashtë. Megjithatë, analistët thonë se këto tarifa nuk do të reduktojnë defiçitin. Sipas tyre, ekonomia e Shteteve të Bashkuara ka vazhduar të fuqizohet më shpejtë se vendet e tjera të industrializuara prandaj edhe përkeqësimi i defiçitit tregtar nuk përbën surprizë.
Departamenti i Tregtisë bëri të ditur se hendeku tregtar u rrit me 1.6% në 57.6 miliardë dollarë në Shkurt, që është niveli më i lartë që prej Tetorit 2008. Defiçiti është rritur për 6 muaj radhazi dhe pjesa më e madhe ka reflektuar rritjen e çmimeve të lëndëve të para. Defiçiti tregtar në mallra ishte më i larti që prej Korrikut 2008, ndërsa sufiçiti në shërbime, më i ulëti që prej Dhjetorit 2012.
Ndërkohë që defiçiti tregtar me Kinën, që ka ndjeshmëri të lartë politike, ra me 18.6% në 29.3 miliardë dollarë në Shkurt, për të gjithë vitin është rritur me 20.2%. Administrata e Trump lajmëroi këtë javë tarifa në 25% për 1,300 produkte kineze të teknologjisë, transportit dhe mjekësisë, për të detyruar ndryshime në praktikat e pronës intelektuale të Pekinit. Kina u kundërpërgjigj në mënyrë direkte me një listë të ngjashme të importeve amerikane, përfshirë sojën, avionët dhe makinat.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.